Marriott International-მა შეკვეთილის Paragraph ევროპაში საუკეთესო ფრენჩაიზის სასტუმროების ნომინაციაზე წარადგინა

თბილისი (BPI) – Marriott International-მა 2018 წლის საუკეთესო ფრენჩაიზის სასტუმროების ნომინაციაზე შეკვეთილში მდებარე სასტუმრო Paragraph ევროპის 300 სასტუმროს შორის პირველ სამეულში წარადგინა.

სასტუმროს მენეჯმენტის ინფორმაციით, უმაღლესი ჯილდოს გადაცემის ცერემონია 26 ივნისს, ლონდონში გაიმართება.

Marriott International საუკეთესო ფრენჩაიზის სასტუმროს გამოვლენისა და დაჯილდოების ცერემონიას ყოველწლიურად ატარებს.

„მთელი გუნდის სახელით შემიძლია ვთქვა, რომ ეს ძალიან დიდი მიღწევაა ჩვენთვის და ამით ნამდვილად ვამაყობთ. როგორც ცნობილია, ევროპაში 300-მდე „ფრენჩაიზ“ სასტუმროა და ამ ნომინაციაში საუკეთესო სამეულში მოხვედრა იმის მაჩვენებელია, რომ ჩვენი გუნდის დამოკიდებულება სასტუმროს, მისი სტუმრების, Marriott -ისა და Paragraph -ის ბრენდისადმი არა მხოლოდ აკმაყოფილებს მომხმარებელთა მოთხოვნებს, არამედ ყოველგვარ მოლოდინს აჭარბებს, რაც „მარიოტის“ ქსელისთვის დამახასიათებელი მომსახურებისა და ქართული სტუმარ-მასპინძლობის დამსახურებაა“, – განაცხადა „მარიოტის“ ევროპის ფრენჩაიზინგის ვიცე-პრეზიდენტმა, მორტენ სკუმსრუდმა.

გახსნის დღიდან დაახლოებით ერთ წელიწადში, შეკვეთილში მდებარე სასტუმრო Marriott International 2018 წლის ოფიციალური შედეგების მიხედვით, Paragraph-ი Autograph Collection ბრენდის ევროპის სასტუმროებს შორის პირველ ადგილზე დაასახელა. სტატუსი მომხმარებელთა კმაყოფილების ინდექსით განისაზღვრა, რის ფარგლებშიც შეკვეთილში მდებარე სასტუმრო Paragraph მოწინავე ადგილს საკმაოდ მაღალი ნიშნულით ინარჩუნებს და უსწრებს ლონდონში, მილანში, ბარსელონაში, რომში და სხვა ევროპულ ქალაქებში მოქმედ სასტუმროებს.

შეკვეთილში მდებარე სასტუმროს ოპერირებას უწევს შპს „სასტუმროების მართვის კომპანია“, რომელიც 2015 წელს დაარსდა და სასტუმროების ქსელის Marriott International-ის ფრენჩაიზის ოფიციალური ლიცენზიის მფლობელია. აღნიშნული კომპანია არა მხოლოდ Autograph Collection ბრენდის სასტუმროებს უწევს ოპერირებას, არამედ მას უფლება აქვს, მართოს „მარიოტის“ საერთაშორისო ქსელში არსებული სხვა ბრენდებიც მთელი საქართველოს მასშტაბით.

„პარაგრაფ რეზორტი და სპა შეკვეთილში“ „საქართველოს თანაინვეტსირების ფონდის“ პორტფელში ერთ-ერთი პირველი და წარმატებული პროექტია, ტურიზმისა და უძრავი ქონების მიმართულებით. 220 ნომრიან სასტუმროში თავმოყრილია 1600 მ³ მოცულობის აკვარიუმი, 115 მ-ზე ზღვაში შეჭრილი აუზი, ბავშვთა გასართობი სივრცეები, ზამთრის ბაღი, მასშტაბური საკონფერენციო დარბაზები და რესტორნები. პროექტის ჯამური საინვესტიციო მოცულობა 100 მლნ აშშ დოლარს აჭარბებს.

„პარაგრაფ რეზორტი და სპა შეკვეთილში“ პირველი სასტუმროა, რომელიც Marriott ქსელის Autograph Collection ბრენდის სტატუსით ოპერირებს საქართველოს ბაზარზე. 2020 წლის ბოლომდე კი, თბილისში, თავისუფლების მოედანზე (ყოფილი ცეკავშირის შენობის ადგილზე) და თაბორის ქედზე კიდევ ორი სასტუმროს გახსნაა დაგეგმილი, რომლებიც Marriott ქსელის Autograph Collection და Luxury Collection ბრენდების სტატუსით დაიწყებენ ოპერირებას.

ასევე, 2022 წლისთვის, სოლოლაკის მაღლობზე, ამავე ბრენდის კიდევ ერთი სასტუმრო და მასშტაბური საკონფერენციო ცენტრი გაიხსნება.

„საქართველოს თანაინვესტირების ფონდი“ 2013 წლიდან ბიძინა ივანიშვილის ინიციატივით შეიქმნა. ფონდის მთავარი მიზანია, საქართველოში სხვადასხვა ინდუსტრიებში საინვესტიციო პროექტების განხორციელება. დღეის მდგომარეობით, „საქართველოს თანაინვესტირების ფონდი“ 12 პროექტს აერთიანებს, რომელთა ჯამური საინვესტიციო მოცულობა 2 მილიარდ აშშ დოლარს აღემატება და მათი მეშვეობით საქართველოში ჯამურად 6 000-მდე ახალი სამუშაო ადგილი შეიქმნება.

1tv.ge