ბათუმში წლის ბოლოდან ახალი ელექტროავტობუსები ივლიან

თბილისი (BPI) – ბათუმის მერიაში 10 ელექტროავტობუსის შეძენის მიზნით გამოცხადებული საერთაშორისო ტენდერის მეორე ეტაპის სატენდერო პაკეტები გაიხსნა.

დოკუმენტაციას ევროპის რეკონსტრუქციისა და განვითარების ბანკი (EBRD) 30 დღის განმავლობაში განიხილავს და გამარჯვებულს გამოავლენს.

ბათუმისთვის ელექტროავტობუსების შეძენის მიზნით საერთაშორისო ტენდერი ევროპის რეკონსტრუქციისა და განვითარების ბანკმა (EBRD) იანვარში გამოაცხადა.

ტენდერის პირველ ეტაპზე ტექნიკური დოკუმენტაცია სამმა კომპანიამ წარმოადგინა. წარმოდგენილი წინადადებების განხილვა ევროპის რეკონსტრუქციისა და განვითარების ბანკის (EBRD) მიერ დაქირავებულმა კონსულტანტებმა განახორციელეს. პირველი ეტაპი სამივე კომპანიამ გადალახა. მეორე ეტაპზე კი, ფინანსური დოკუმენტაცია ორმა კომპანიამ წარმოადგინა.

ელექტროავტობუსების შეძენა ევროპის რეკონსტრუქციისა და განვითარების ბანკის მიერ გამოყოფილი დაბალპროცენტიანი სესხითა და მოპოვებული გრანტის საშუალებით ხორციელდება.

ახალი ელექტროავტობუსები ბათუმში წლის ბოლომდე გამოჩნდება. ელექტროავტობუსების ფერის შესარჩევად კონკურსი გამოცხადდება.