Business Political Insights BPI.GE
საქართველოს სტატისტიკის ეროვნულმა სამსახურმა, ბავშვთა დაცვის საერთაშორისო დღეს, თბილისის კლასიკურ გიმნაზიაში საბავშვო პორტალის – ,,სტატისტიკა ბავშვებისთვის და მოზარდებისთვის“ პრეზენტაცია გამართა.
საქსტატის აღმასრულებელმა დირექტორმა კლასიკური გიმნაზიის მოსწავლეებს საქართველოს შესახებ საინტერესო და სახალისო სტატისტიკური ფაქტები გააცნო და მათთან ერთად შემეცნებითი ქვიზები შეავსო. პორტალი ,,სტატისტიკა ბავშვებისთვის და მოზარდებისთვის“ სხვადასხვა ასაკობრივ ჯგუფებზეა განკუთვნილი და მისი პრეზენტაციაც შესაბამისად შერჩეული ასაკობრივი კატეგორიის მოსწავლეებისთვის განხორციელდა. პორტალი ორი ძირითადი ნაწილისგან შედგება: პირველი ნაწილი – „სტატისტიკა ბავშვებისთვის“ – განკუთვნილია 8-დან 12 წლის ასაკის ბავშვებისთვის. ამ ნაწილში წარმოდგენილი თემები მორგებულია შესაბამის სამიზნე აუდიტორიაზე, მოიცავს სახალისო შეკითხვებს სხვადასხვა კატეგორიებიდან, როგორიცაა: დემოგრაფია, განათლება, სოფლის მეურნეობა და ა.შ. პორტალი ასევე აერთიანებს, საინტერესო ფაქტებს საქართველოს რეგიონების შესახებ. პორტალის პირველი ნაწილი მე-6 კლასის მოსწავლეებისთვის საინტერესო და სახალისო აღმოჩნდა. ასეთივე ინტერესით გაეცნენ 11-ე კლასის მოსწავლეები მოზარდებზე ორიენტირებულ პორტალის მეორე ნაწილს, რომელიც 13-დან 19 წლის ასაკის ახალგაზრდებზეა მორგებული. პორტალის ამ ნაწილში წარმოდგენილია საინტერესო ინფორმაცია საქართველოს შესახებ. აღნიშნული ნაწილის მეშვეობით მოზარდებს ეძლევა შესაძლებლობა ამოხსნან შემეცნებითი ქვიზები და გაეცნონ სახალისო სტატისტიკურ ფაქტებს. როგორც გოგიტა თოდრაძემ აღნიშნა, ინტერაქტიული პორტალის მიზანია, ბავშვებისა და ახალგაზრდებისთვის სტატისტიკური ინფორმაციის მიწოდება საინტერესო და სახალისო გზით. პორტალი მნიშვნელოვნად შეუწყობს ხელს ბავშვებსა და მოზარდებს გაიღრმავონ ცოდნა სტატისტიკის სფეროში, გაიუმჯობესონ ინფორმაციის სწორად აღქმისა და ანალიტიკური აზროვნების უნარები, იყვნენ უფრო მეტად ინფორმირებულები ბავშვთა უფლებების შესახებ და მიიღონ მტკიცებულებებზე დაფუძნებული გადაწყვეტილებები. საქსტატის აღმასრულებელმა დირექტორმა, ყველაზე აქტიურ მოსწავლეებს სპეციალური სიგელები გადასცა.
