ევროკომისიამ საქართველოს მიერ DCFTA-ით აღებული ვალდებულებების განხორციელების პროგრესს მაღალი შეფასება მისცა – გენდი არველაძე

“ევროკომისიამ, საქართველოსა და ევროკავშირს შორის ვაჭრობის საკითხებზე ასოცირების კომიტეტის მერვე შეხვედრაზე მაღალი შეფასება მისცა საქართველოს მიერ DCFTA-ით აღებული ვალდებულებების განხორციელების პროგრესს და მზაობა გამოხატა ამ პროცესში საქართველოს დახმარების გაგრძელების თაობაზე” – ამის შესახებ ეკონომიკის მინისტრის მოადგილემ, გენადი არველაძემ საქართველოს პარლამენტში, დარგობრივი ეკონომიკისა და ეკონომიკური პოლიტიკისა და ევროპასთან ინტეგრაციის კომიტეტების ერთობლივი სხდომაზე განაცხადა.

მინისტრის მოადგილემ დეპუტატებს საქართველოსა და ევროკავშირს შორის „ღრმა და ყოვლისმომცველი თავისუფალი სავაჭრო სივრცის შესახებ” შეთანხმების (DCFTA) 2021 წლის ეროვნული სამოქმედო გეგმის შესრულების შესახებ ანგარიში და „ღრმა და ყოვლისმომცველი თავისუფალი სავაჭრო სივრცის შესახებ” შეთანხმების (DCFTA) განხორციელების 2022 წლის სამოქმედო გეგმა წარუდგინა.

გენადი არველაძის ინფორმაციით,  ევროკომისიის შეფასებაში,  DCFTA-ის განხორციელების მხრივ პროგრესის ფარგლებში განსაკუთრებული აქცენტი გაკეთდა საქართველოს მიერ საჯარო შესყიდვების, სურსათის უვნებლობის, ვეტერინარიის და მცენარეთა დაცვის, კონკურენციის, შრომის უსაფრთხოების, ბაზარზე ზედამხედველობის სფეროებში განხორციელებულ რეფორმებზე.
“მოგეხსენებათ, რომ მიმდინარე წლის 3 მარტს საქართველომ გააკეთა განაცხადი ევროკავშირში წევრობაზე. ეს უმნიშვნელოვანესი ეტაპია საქართველოს ევროპული ინტეგრაციის გზაზე. საქართველოს მთავრობის ამ გადაწყვეტილებამ დააჩქარა ქვეყნის ევროპულ ოჯახში გაერთიანების პროცესი და კიდევ მეტი მნიშვნელობა შესძინა ასოცირების შეთანხმებისა და DCFTA-ის ვალდებულებების განხორციელების პროცესს. საქართველოს მთავრობის ძირითადი ძალისხმევა მიმართულია ამ პროცესის მაქსიმალური ხელშეწყობისკენ” – აღნიშნა გენადი არველაძემ.

შემთხვევითი სიახლე

ირაკლი ლექვინაძემ მცირე და საშუალო მეწარმეთა ევროპულ კონგრესში მიიღო მონაწილება

პოლონეთის მცირე და საშუალო მეწარმეთა ომბუდსმენის მოწვევით კონკურენციის ეროვნული სააგენტოს თავმჯდომარემ ირაკლი ლექვინაძემ და საქართველოს …