მთავრობა უკრაინასა და რუსეთში ბაზირებულ საერთაშორისო კომპანიებთან ბიზნესის საქართველოში გადმოტანაზე მუშაობს

ლევან დავითაშვილი – მთავრობა ინტენსიურად მუშაობს უკრაინასა და რუსეთში ბაზირებულ საერთაშორისო კომპანიებთან, რომ მათ თავიანთი ოპერაციები საქართველოში გადმოიტანონ

მთავრობა აქტიურად მუშაობს უკრაინასა და რუსეთში ბაზირებულ სხვადასხვა საერთაშორისო კომპანიასთან, რომ მათ საკუთარი ოპერაციები საქართველოში გადმოიტანონ, – ამის შესახებ ვიცე-პრემიერმა, ეკონომიკისა და მდგრადი განვითარების მინისტრმა ლევან დავითაშვილმა მთავრობის სხდომის დასრულების შემდეგ გამართულ ბრიფინგზე განაცხადა.

მინისტრის თქმით, ინტენსიური მუშაობა მიდის ბრიტანულ, გერმანულ და სხვა კომპანიებთან, რომ ისინი საქართველოში გადმოვიდნენ და ქვეყანამ ამით მიიღოს ამა თუ იმ სექტორის განვითარების შესაძლებლობა, ასევე გაჩნდეს დასაქმების ახალი შესაძლებლობები, მოხდეს კომპეტენციების ტრანსფერი, კვალიფიკაციის ამაღლება და ა.შ. საბოლოოდ ეს ეკონომიკაში უნდა იყოს თავისი წვლილის შემტანი.

„ჩვენ ძალიან ორგანიზებულად ვმუშაობთ უცხოელ ბიზნეს თუ სახელმწიფო ორგანიზაციებთან ერთად, ასევე საერთაშორისო პარტნიორებთან. ფინანსთა სამინისტროს, ეკონომიკის სამინისტროს და სხვა შესაბამისი უწყებების თანამშრომლები გაერთიანებულები ვართ, ორგანიზებულად ვაკეთებთ ამას და ალბათ, უკეთესად გავაკეთებთ, ვიდრე სხვა ქვეყნები, რომ საერთაშორისო კომპანიებმა საქართველო როგორც ჰაბი, ისე განიხილონ თავიანთი ოპერაციებისთვის. ეს უფრო წარმატებით მიმდინარეობს მომსახურების სფეროში, ცოტა უფრო გრძელვადიანია საწარმოების კუთხით, თუმცა აქაც მიმდინარეობს მუშაობა; ასევე, სხვადასხვა ლოჯისტიკური და სატრანსპორტო მიმართულებით სახელმწიფო აქტიურად არის ჩართული იმისთვის, რომ ამ სიტუაციაში ქვეყანამ მაქსიმალურად მოახდინოს რესურსების ოპტიმიზაცია“, – განაცხადა ლევან დავითაშვილმა.

 

შემთხვევითი სიახლე

ირაკლი ლექვინაძემ მცირე და საშუალო მეწარმეთა ევროპულ კონგრესში მიიღო მონაწილება

პოლონეთის მცირე და საშუალო მეწარმეთა ომბუდსმენის მოწვევით კონკურენციის ეროვნული სააგენტოს თავმჯდომარემ ირაკლი ლექვინაძემ და საქართველოს …