ქართული ინოვაციური სტარტაპებისთვის Samsung-ის ინოვაციების ცენტრის კარი ღიაა

თბილისი (BPI) – აშშ-ში, Samsung-ის ინოვაციების ცენტრთან საქართველოს ტექნოლოგიურ და ინოვაციურ სტარტაპებს ურთიერთობის დამყარების შესაძლებლობა აქვთ.

ეკონომიკის მინისტრის გიორგი ქობულიას თქმით, Samsung-ის აშშ-ის ინოვაციების ცენტრი ეძებს საინტერესო იდეებს და ამ პროცესში ქართული სტარტაპების ჩართულობა მნიშვნელოვანი იქნება საქართველოში ინოვაციების განვითარებისთვის.

Samsung-ის ვიცე-პრეზიდენტთან მოლაპარაკებებს მინისტრმა კორეაში ვიზიტისას მიაღწია. კორპორაციის ვიცე-პრეზიდენტებთან შეხვედრისას გიორგი ქობულიამ საქართველოში არსებულ ინოვაციურ ეკოსისტემაზე ისაუბრა და ყურადღება გაამახვილა მთავრობის მიერ დაფინანსებულ პროგრამებზე ტექნოლოგიური პარკებისა და სხვა ინოვაციური ინფრასტრუქტურის განვითარების მიმართულებით. შეხვედრაზე ხაზი გაესვა Samsung-ის მეტი ჩართულობის მნიშვნელობას აღნიშნულ პროცესში. კორეული კორპორაციის წარმომადგენლები დაინტერესდნენ საქართველოში ტექნოლოგიური პროცესებით, აგრეთვე ინოვაციური სტარტაპების მხარდაჭერის პროგრამებით. Samsung-ის წარმომადგენლებმა გამოთქვეს მზადყოფნა განიხილოს წინადადებები საქართველოში მათი საქმიანობის დივერსიფიკაციასთან დაკავშირებით. 

Samsung-ის ვიცე-პრეზიდენტებთან შეხვედრა   სეულთან ახლოს, ქალაქ სუვონში Samsung-ის ციფრულ  ქალაქში გაიმართა.  გიორგი ქობულიამ ციფრულ ქალაქში მდებარე “სამსუნგის” ინოვაციური მუზეუმი დაათვალიერა.