“ზარაფხანა”-ს მიერ სარეგისტრაციოდ წარმოდგენილ ახალ დიზაინზე „ჭადრაკი“ საქპატენტმა დადებითი გადაწყვეტილება გამოიტანა

2018 წლიდან დღემდე, კომპანია „ზარაფხანას“ საქპატენტში რეგისტრირებული აქვს 44 დიზაინი, მათ შორის ჭადრაკის ფიგურები და საიუველირო ნაწარმი: ბეჭედი, საყურე, სამაჯური და ყელსაბამი. კომპანია მრავალი წელია ბუნებრივი და ძვირფასი, ასევე, არაძვირფასი ქვების გამოყენებით ოქროს, ვერცხლისა თუ თითბრის ნაკეთობებს ქმნის, რომელთა დიზაინი საუკეთესო საოქრომჭედლო ტრადიციებისა და თანამედროვე ტენდენციების სინთეზია.

ამჯერადაც, კომპანიის მიერ წარმოდგენილმა განაცხადმა დიზაინზე „ჭადრაკი“ ფორმალური მოთხოვნებისა და არსობრივი ექსპერტიზა გაიარა და რეგისტრაციაზე დადებითი გადაწყვეტილების გამოტანის შესახებ ინფორმაცია განთავდა დღეს გამოცემულ სამრეწველო საკუთრების ოფიციალურ ბიულეტენში.

დიზაინის რეგისტრაცია მის მფლობელს ანიჭებს განსაკუთრებულ უფლებას, ნება დართოს ან აკრძალოს მისი დიზაინის შემცველი პროდუქტის გამოყენება, რაც მოიცავს მის დამზადებას, გაყიდვას, იმპორტ-ექსპორტს ან სამოქალაქო ბრუნვაში სხვაგვარ ჩართვას; დიზაინის მფლობელს უფლება აქვს გაყიდოს ან სხვა გზით გაასხვისოს დიზაინი, ან გასცეს ლიცენზია მის გამოყენებაზე; დიზაინზე უფლებების დარღვევა იწვევს სამოქალაქო, ადმინისტრაციულ და სისხლისსამართლებრივ პასუხისმგებლობას.

გაეცანით სამრეწველო საკუთრების ოფიციალური ბიულეტენის მე-12(591) გამოცემას და მიიღეთ ინფორმაცია ინტელექტუალური საკუთრების სხვადასხვა ობიექტების საქართველოში რეგისტრაციის შესახებ: https://tinyurl.com/4hfpd43w