BILLBOARD GEORGIA საქართველოში მუსიკალურ ჩარტებსა და სიახლეებს შემოიტანს

საქართველოში წამყვანმა სატელეკომუნიკაციო კომპანია სილქნეტმა და ლეგენდარულმა ამერიკულმა მუსიკალურმა ბრენდმა ბილბორდმა,   რომელიც მსოფლიო მუსიკალურ ინდუსტრიაში განსაკუთრებული ნდობით სარგებლობს, ბილბორდ საქართველოს -Billboard Georgia-ს – დაარსების შესახებ განაცხადეს.

ახალი პარტნიორობა მნიშვნელოვნად გაამდიდრებს სილქნეტის ციფრულ ეკოსისტემას  და მომხმარებლისთვის მრავალფეროვანი მუსიკალური კონტენტის შეთავაზების საშუალებას მისცემს. ბილბორდისთვის ეს პარტნიორობა, განუწყვეტელი გლობალური წინსვლის პროცესში, ახალი, საინტერესო საფეხურია.

მნიშვნელოვანია, რომ სილქნეტისა და ბილბორდის თანამშრობლობის შედეგად შეიქმნება პირველი ოფიციალური მუსიკალური ჩარტების სისტემა არა მხოლოდ საქართველოში, არამედ ასევე კავკასიასა და ცენტრალური აზიის რეგიონში.

მუსიკალურ ჟურნალისტიკაში ბილბორდი ოქროს სტანდარტს წარმოადგენს, რადგან ის ინდუსტრიაში საუკეთესო ჩარტებს ქმნის და მუსიკის ნებისმიერი ჟანრის ყველაზე სრულყოფილ ბაზას აწარმოებს. ამდენად, ქართული სამუსიკო სფეროსთვის ბილბორდის შემოსვლას განსაკუთრებული მნიშვნელობა აქვს.

ამის  აღსანიშნად 2 ივლისს საუთჰემპტონში (ნიუ-იორკი) სილქნეტი  გამართავს ღონისძიებას, რომელიც, ამავდროულად, საქართველოსა და ამერიკას შორის  დიპლომატიური ურთიერთობების 30 წლის იუბილეს მიეძღვნება.

საუთჰემპტონის ხელოვნების ცენტრთან (Southampton Arts Center) და ჰემპტონის ჯაზის ფესტივალთან (Hamptons Jazz Festival) თანამშრომლობით გამართულ ღონისძიებას ამერიკისა და საქართველოს ბიზნესის, კულტურისა და დიპლომატიური სფეროს გამოჩენილი წარმომადგენლები დაესწრებიან; მათ შორისაა ამერიკული ჯაზის ლეგენდა ვინტონ მარსალისი (Wynton Marsalis), რომელიც Jazz at Lincoln Center Orchestra-სთან ერთად კონცერტს გამართავს.

სილქნეტი ციფრული ეკოსისტემის ფართო სპექტრს ავითარებს, რომლის საფუძველი საქართველოს სატელეკომუნიკაციო ბაზარზე საუკეთესო ხარისხის ინფრასტურტურით არის განპირობებული. ბილბორდისა და სილქნეტის პარტნიორობით ჩვენ გვინდა ბაზარზე წარმოვადგინოთ ყველაზე სრულყოფილი მსოფლიო დონის მუსიკალური და გასართობი კონტენტი და მასთან ერთად პირველებმა გავაცნოთ საზოგადოებას მუსიკალური ინდუსტრიის ყველა სიახლე და ინოვაცია, რომელსაც ეზიარებიან ჩვენი მომხმარებლები, განსაკუთრებით კი ახალგაზრდები, ვისთვისაც ეს სიახლეები ყველაზე აქტუალურია. ამასთანავე, ბოლბორდ საქართველო ქართველ მუსიკოსებსაც მისცემს უნიკალურ შესაძლებლობას უფრო ფართო აუდიტორიას გააცნონ თავიანთი შემოქმედება. მინდა ამ პარტნიორობისთვის და ნდობისათვის მადლობა გადავუხადო ბილბორდს,”- განაცხადა სილქნეტის სამეთვალყურეო საბჭოს თავმჯდომარემ, გიორგი რამიშვილმა.

ბილბორდი საქართველო და სილქნეტი აქტიურად ითანამშრომლებენ ბილბორდის გლობალურ პარტნიორებთან, რათა ქართველმა მუსიკოსებმა შეძლონ თავიანთი შემოქმედების ფართო აუდიტორიისთვის გაცნობა და  მსოფლიოს სხვადასხვა  სცენაზე უკეთ წარმოჩენა.

ბილბორდის შესახებ

ბილბორდი გლობალური მუსიკალური ბრენდია, რომელიც მსოფლიო მუსიკალურ ინდუსტრიაში განსაკუთრებული ნდობით სარგებლობს, როგორც შემსრულებლებს, ასევე მსმენელებს შორის. ასევე, ბილბორდი წარმოადგენს მსოფლიოში ნომერ პირველ ავტორიტეტულ მუსიკალურ ჟურნალს, რომელიც უპირობო ლიდერია მუსიკალური სიახლეების, ტრენდებისა და ინდუსტრიის განმსაზღვრელი ჩარტების წარმოებაში, ფლობს რა მუსიკალურ ჟანრთა ყველაზე სრულყოფილ და აღიარებულ ერთიან ბაზას. ამასთანავე, ბილბორდი პერიოდულად მასპინძლობს ყველაზე ელიტურ კონფერენციებსა და ღონისძიებებს, რომლებზეც მუსიკალური ინდუსტრიის ყველაზე გავლენიანი პირები იკრიბებიან.

სილქნეტის შესახებ

სილქნეტი ქვეყნის წამყვანი ფიქსირებული და მობილური ქსელის სატელეკომუნიკაციო ოპერატორია, რომელიც ინდივიდუალურ მომხმარებლებს, ოჯახებსა და ბიზნესს სთავაზობს სრული სპექტრის სატელეკომუნიკაციო სერვისებს, როგორებიცაა მობილური მომსახურება, ფიქსირებული ინტერნეტი, მაუწყებლობის ტრანზიტი და ფიქსირებული ტელეფონია. სილქნეტს მინიჭებული აქვს მუდის (Moody’s) B1/სტაბილური და ფიტჩის (Fitch) B/სტაბილური საკრედიტო რეიტინგები. საქართველოს მასშტაბით სილქნეტს ჰყავს:

  • დაახლოებით 1.71 მილიონი მობილური ქსელის აბონენტი
  • დაახლოებით 186,000 ფიქსირებული ქსელის აბონენტი
  • დაახლოებით 306,000 ფიქსირებული ინტერნეტის აბონენტი
  • დაახლოებით 234,000 მაუწყებლობის ტრანზიტის აბონენტი

(მონაცემები წარმოდგენილია 31/03/2022 მდგომარეობით; წყარო: საქართველოს კომუნიკაციების ეროვნული კომისია; მაუწყებლობის ტრანზიტი არ მოიცავს მობილური სტრიმინგის აპლიკაციის მომხმარებლებს)

სილქნეტი კავკასიაში ერთ-ერთი წამყვანი საინვესტიციო ჯგუფის, სილქ როუდ ჯგუფის, ნაწილია.

 

 

შემთხვევითი სიახლე

სემეკის ბიუჯეტის ზრდა ბუნებრივია, რადგან ბოლო 10 წელში მათი საქმიანობის არეალი გაზრდილია – ვახტანგ ჭარაია

“სემეკის საქმიანობა 2013 წელთან შედარებით დღეის მდგომარეობით გაცილებით გაზრდილია, შესაბამისად, მეტი თანხა რომ დაიხარჯება მათ …