Business Political Insights BPI.GE
ეკონომიკისა და მდგრადი განვითარების მინისტრის მოადგილე მარიამ ქვრივიშვილი აზერბაიჯანის ტურიზმის საბჭოს წარმომადგენლებს შეხვდა, რომლებიც საქართველოში სამუშაო ვიზიტით იმყოფებიან.
შეხვედრას ასევე დაესწრო საქართველოს ტურიზმის ეროვნული ადმინისტრაციის უფროსის პირველი მოადგილე, თამარ ყორიაული.
შეხვედრაზე განიხილეს საქართველოსა და აზერბაიჯანს შორის თანამშრომლობის პრიორიტეტული მიმართულებები ტურიზმისა და სამოქალაქო ავიაციის სექტორებს შორის. ყურადღება გამახვილდა კოვიდ-პანდემიის გამოწვევებზე, რომლებმაც გავლენა მოახდინეს აღნიშნული დარგების მდგომარეობაზე.
როგორც აღინიშნა, სამხრეთ კავკასიის რეგიონში სამიზნე ქვეყნებიდან მეტი მოგზაურის დასაინტერესებლად და ჩამოსაყვანად, მნიშვნელოვანია რეგიონის ქვეყნების ერთობლივი ძალისხმევა, რაც სამომავლოდ ხელს შეუწყობს თითოეულ ქვეყანაში ტურიზმისა და სამოქალაქო ავიაციის სექტორების განვითარებას.
