Business Political Insights BPI.GE
თბილისი (BPI) – თიბისი ბანკის საერთაშორისო აქციონერებმა ერთ თვეში $200 მლნ-ის ზარალი მიიღეს, იზარალა საქართველომაც, – წერს მამუკა ხაზარაძე გავრცელებულ განცხადებაში, სადაც ნათქვამია, რომ ტოვებს თიბისი.
“ყოველგვარი გამოძიებისა და სასამართლოს გადაწყვეტილების გარეშე მოგვაყენეს სერიოზული რეპუტაციული ზიანი ფულის გათეთრების აბსურდულ საკითხთან ვითომდა კავშირში, რომლის არარსებობა საერთაშორისო დონეზეა დამტკიცებული. სამწუხაროდ, არცერთ სახელმწიფო მოხელეს არ გამოუთქვამს სურვილი, პრემიერის და მისი მინისტრების ჩათვლით, შეგვხვედროდნენ და პირადად დაინტერესებულიყვნენ ამ მეტად მნიშვნელოვანი საქმით, როგორც ჩვენი გუნდისთვის, ისე ჩვენი ქვეყნისთვის, მიუხედავად იმისა, რომ რამოდენიმე მათგანს პირადად მივწერე და შესაბამისი დოკუმენტებიც გადავუგზავნე გასაცნობად, პასუხი არავისგან მოსულა. სამაგიეროდ მოვისმინე მათი ბევრი კომენტარი საჯარო სივრცეში. მე მივხვდი, რომ მიზანი ჩემი დისკრედიტაციაა, იმასაც მივხვდი, რომ აქ, ჩვენთან, წარმატებას ებრძვიან, მივხვდი, რომ კომპანიის ზრდას საქართველოში ლიმიტი უნდა ჰქონდეს დაწესებული. ჩემზე ასეთი თავდასხმა პირდაპირ აისახება ჩვენი ბანკის რეპუტაციაზე.” წერს ხაზარაძე.
იქვე ნათქვამია, რომ ბანკი კი არ შეიძლება ხანგრძლივ სასამართლო დავაში იყოს თავის რეგულატორთან, მითუმეტეს თუ ეს უკანასკნელი არაა თავისუფალი თავის გადაწყვეტილებებში, მიუხედავად მისი კანონით მინიჭებული მაღალი ხარისხის დამოუკიდებლობისა.
განცხადების თანახმად, ლონდონში ბანკის სამეთვალყურეო საბჭომ ბანკის, მისი აქციონერების და დეპოზიტარების ინტერესებიდან გამომდინარე ეროვნულ ბანკთან სამართლებრივი დავის შეწყვეტასთან დაკავშირებით
მიიღო გადაწვეტილება.
