ევროკავშირსა და დსთ-ს ქვეყნებში ქართულ პროდუქციაზე მოთხოვნა იზრდება

თბილისი (BPI) – ქართული პროდუქციის ექსპორტი ევროკავშირისა და დსთ-ს ქვეყნებში გაიზარდა.

“საქსტატის” მონაცემებით, 2019 წლის იანვარ-აპრილში, საქართველოდან ევროკავშირის ქვეყნების ბაზრებზე 276.2 მლნ დოლარის ქართული პროდუქცია გავიდა, 14.3%-ით მეტი წინა წლის შესაბამის მაჩვენებელზე.
საქართველოდან დსთ-ის ქვეყნებში ექსპორტირებულია 576.5 მლნ დოლარის საქონელი, 34.1%-ით მეტი, 2018 წლის შესაბამის მაჩვენებელთან შედარებით.

იმპორტის მოცულობამ ევროკავშირის ქვეყნებთან 709.7 მლნ დოლარს მიაღწია (14.7%-ით ნაკლები). სავაჭრო ბრუნვამ ევროკავშირის ქვეყნებთან 985.9 მლნ. აშშ დოლარი შეადგინა, რაც წინა წლის შესაბამის მაჩვენებელს 8.2%-ით ჩამორჩება. რაც შეეხება სავაჭრო დეფიციტს, 2019 წლის იანვარ-აპრილში მთლიან უარყოფით სავაჭრო ბალანსში მისი წილი 27.2%-ით განისაზღვრა.

დსთ-ს ქვეყნებთან იმპორტის მოცულობა 773.4 მლნ დოლარს გაუტოლდა (11.8%-ით ნაკლები). სავაჭრო ბრუნვამ დსთ-ის ქვეყნებთან 1 350.0 მლნ. აშშ დოლარი შეადგინა, რაც წინა წლის შესაბამის მაჩვენებელზე 3.3 პროცენტით მეტია. რაც შეეხება სავაჭრო დეფიციტს, 2019 წლის იანვარ-აპრილში, მისი წილი მთლიან უარყოფით სავაჭრო ბალანსში 12.4 პროცენტი იყო.