თბილისის მერის მოადგილის თანამდებობას ილია ელოშვილი დაიკავებს

თბილისი (BPI) –  კახა კალაძემ თბილისის მერის კიდევ ერთი მოადგილის  კანდიდატურა წარადგინა.  თბილისის მერის მოადგილის თანამდებობას ილია ელოშვილი დაიკავებს.

კახა კალაძემ აღნიშნა, რომ ახალი ენერგიით, დედაქალაქის განვითარებისთვის ბევრი მნიშვნელოვანი პროექტი განხორციელდება.

„ილია ელოშვილი წლების განმავლობაში, ჩემთან ერთად, ენერგეტიკის სამინისტროში მინისტრის მოადგილედ მუშაობდა. ჩვენ 2012 წლიდან ძალიან ბევრი მნიშვნელოვანი პროექტი განვახორციელეთ და საქართველოს ენერგეტიკის წინსვლაში მისი დიდი დამსახურებაა. იმედი მაქვს, რომ ერთიანი ძალისხმევით, ახალი ენერგიით, ჩვენი დედაქალაქის წინსვლისა და განვითარებისთვის ძალიან ბევრს გავაკეთებთ“, – განაცხადა კახა კალაძემ.

მისივე თქმით, ქალაქის განვითარებისა და წინსვლისთვის ძლიერი გუნდი მნიშვნელოვანია, რომელიც პროფესიონალებით, კომპეტენტური და პატიოსანი ადამიანებით უნდა იყოს დაკომპლექტებული.

„ჩვენ წინასაარჩევნოდ შვიდპუნქტიანი გეგმა გვქონდა წარმოდგენილი, სადაც ყველა ის მიმართულება იყო გაწერილი, რომელიც ჩვენს დედაქალაქს აწუხებს. შესაბამისად, მომდევნო ოთხი წლის განმავლობაში, ჩემი გუნდით აქტიურად მივიღებთ მონაწილეობას ამ პროექტების განხორციელებაში. მინდა ვისარგებლო შემთხვევით და მადლობა გადავუხადო გიგა ნიკოლეიშვილს, რომელიც მერის მოადგილის თანამდებობას იკავებდა. ის დაცვის პოლიციას უხელმძღვანელებს და მინდა მას მომავალ საქმიანობაში წარმატებები ვუსურვო“, – განაცხადა მერმა.

ილია ელოშვილმა თბილისის მერს გამოცხადებული ნდობისთვის მადლობა გადაუხადა და აღნიშნა, რომ ეს მისთვის დიდი პასუხისმგებლობაა.

„ეს პირველ რიგში, ჩემთვის უდიდესი პასუხისმგებლობაა. ძალიან ბევრი საქმეა გასაკეთებელი და მიხარია, რომ ვარ იმ გუნდში, რომელშიც ძალიან დიდ ენერგიასა და მონდომებას ვხედავ. ვეცდები, თქვენი იმედები ყველანაირად გავამართლო“, – აღნიშნა ილია ელოშვილმა.

შემთხვევითი სიახლე

საბანკო სექტორს ივნისში მოგება შეუმცირდა

თბილისი (BPI) – საბანკო სექტორმა ივნისში 48 მლნ მოგება მიიღო (მაისი – 68 მლნ; -42%m.m). 1 ივლისის მდგომარეობით …