ნიკოლოზ გაგუა: სსფ პოზიტიურად აფასებს დოლარიზაციის შესამცირებლად განხორციელებულ ღონისძიებებს

თბილისი (BPI) – საერთაშორისო სავალუტო ფონდის აღმასრულებელ დირექტორთა საბჭოს სხდომაზე, დიდი ინტერესი გამოიწვა ხელისუფლების მიერ გადადგმულმა ნაბიჯებმა, რომელიც ითვალისწინებს ჭარბვალიანობის პრობლემის მოგვარებას და პასუხისმგებლიანი დაკრედიტების სისტემის დანერგვას ქვეყანაში, – განაცხადა ფინანსთა მინისტრმა, ნიკოლოზ გაგუამ დღეს გამართულ ერთობლივ ბრიფინგზე, რომელზეც შეფასდა საერთაშორისო სავალუტო ფონდის მიერ გამოქვეყნებული ანგარიში საქართველოს შესახებ.

როგორც მან აღნიშნა, საერთაშორისო სავალუტო ფონდის მიერ, ასევე, პოზიტიურადაა შეფასებული მთავრობისა და ეროვნული ბანკის მიერ დოლარიზაციის შესამცირებლად განხორციელებული ერთობლივი ღონისძიებები.

ფინანსთა მინისტრმა კიდევ ერთხელ ისაუბრა იმ დადებით ტენდენციებზე, რომელიც 2018 წლის დასაწყისიდან ფიქსირდება ქვეყნის ეკონომიკაში.

„დღეს, სტატისტიკის ეროვნული სამსახურის მიერ გამოქვეყნდა ეკონომიკური ზრდის მაჩვენებელი მაისის თვისთვის, რომელმაც 7.5 პროცენტი შეადგინა. მინდა აღვნიშნო, რომ გასულ წელს, მაისში, ეკონომიკური ზრდის მაჩვენებელი, ასევე, მაღალი იყო – 5.3%. ეს ხაზს უსვამს, თუ რამდენად მდგრადი იყო ეკონომიკური ზრდა ქვეყანში. ჩვენ ასევე, გვქონდა თვალსაჩინო ზრდა ექსპორტის მიმართულებით – ექსპორტი გაიზარდა 50 პროცენტით. იმედი გვაქვს, რომ აღნიშნული ზრდის ტემპი შენარჩუნდება და ამის გარანტიაა ის რეფორმები, რომელიც ჩვენ მიერ არის ინიცირებული,“ – განაცხადა ნიკოლოზ გაგუამ.

მისი თქმით, მთავრობის კიდევ ერთი რეფორმა, რომელსაც ფონდი განსაკუთრებულ ყურადღებას აქცევს – ესაა კაპიტალის ბაზრის განვითარება, რომელიც საპენსიო რეფორმასთან ერთად, ხელს შეუწყობს ეროვნული დანაზოგების ზრდას და კერძო სექტორის გაძლიერებას.

შემთხვევითი სიახლე

ლევან კობერიძე: სამუშაო ადგილების ზრდის მაჩვენებელი ოპტიმისტურია

თბილისი (BPI) – საპარლამენტო უმრავლესობის წევრი ლევან კობერიძე საქსტატის მიერ გამოქვეყნებულ სამუშაო ადგილების ზრდის მაჩვენებელს …