გიორგი ქადაგიძე: “მაგთი” და “ჯეოსელი” წლების განმავლობაში ტარიფებზე შეთანხმებულები იყვნენ

თბილისი (BPI) – ეროვნული ბანკის ყოფილი პრეზიდენტი ბოლო პერიოდში ფიჭური კავშირგაბმულობის ბაზარზე განვითარებულ მოვლენებს ეხმიანება. გიორგი ქადაგიძე სოციალურ ქსელში წერს, რომ ორი კომპანია ათ წელზე მეტი შეთანხმებული იყვნენ ტარიფებზე მესამე მოთამაშის გამოჩენამდე, ამავდროულად საზოგადოებისთვის უცნობია კომპანიებმა რამდენი ასეული მილიონის მოგება მიიღეს.

“კორპორატიული საქართველოს ისტორიიდან.

ოლიგოპოლია – არაკონკურენტული გარემო სადაც მცირე რაოდენობის მოთამაშეები აკონტროლებენ ბაზარს.

ოლიგოპოლია შეიძლება გადაიზარდოს კარტელურ შეთანხმებაში და გამოიხატოს მომხმარებლისთვის გაზრდილ ფასში.

ამის “საუკეთესო” მაგალითია მაგთი და ჯეოსელი.

ეს ორი კომპანია ათ წელზე მეტი შეთანხმებული იყვნენ ტარიფებზე და წუთში 29 თეთრს (ეჭვი მაქვს მსოფლიოში ერთერთ ყველაზე მაღალ ტარიფს) გვახდევინებდნენ. სტატუს-კვო მხოლოდ მესამე მოთამაშის შემოსვლამ დაანგრია. აღმოჩნდა რომ თურმე რამდენიმე თვეში შესაძლებელი ყოფილა საცალო ტარიფის 29 თეთრიდან ჯერ განახევრება და რეგულატორის მიერ „პორტირების“ დანერგვასთან ერთად 3-5 თეთრამდე შემცირება.

რამდენი ასეული მილიონი მოგება ნახეს ამ პერიოდში კომპანიებმა საზოგადოებისთვის ცნობილი არ არის რადგან არცერთი არ აქვეყნებს შესაბამის ფინანსურ ინფორმაციას.

იმისთვის რომ განვითარების შემდეგ ეტაპზე გადავიდეთ საჭიროა ფინანსური გამჭირვალობის მიმართულებით მნიშვნელოვანი რეფორმების განხორციელება.

ჩემი მოკრძალებული აზრით აუცილებელია დეტალური ფინანსური ინფორმაციის გამოქვეყნება სავალდებულო გახდეს შემდეგი კომპანიებისთვის:

– ბუნებრივი მონოპოლიები (თელასი, წყალი, გაზი)
– სსიპ-ებისთვის (რეესტრები, სააგენტოები ა.შ.)
-რეგულირებული ინდუსტრიები (კავშირგაბმულობა, ენერგეტიკა, ჯანდაცვა)
– ყველა კომპანიისთვის რომელსაც ბიუჯეტიდან აქვს შემოსავალი წელიწადში მაგ. 5 მილიონ ლარზე მეტი

ასეთ შემთხვევაში მომხმარებლებს და სხვა დაკავშირებულ პირებს ექნება შესაძლებლობა გაიგონ რატომ გაძვირდა ტარიფი, ფასი, გადასახადი და ა.შ. ასევე შეაფასონ კომპანიების სოციალური პასუხისგებლობის ხარისხი და არა მხოლოდ კარგად გაკეთებული პრ კამპანიები”, – წერს გიორგი ქადაგიძე.

შემთხვევითი სიახლე

საბანკო სექტორს ივნისში მოგება შეუმცირდა

თბილისი (BPI) – საბანკო სექტორმა ივნისში 48 მლნ მოგება მიიღო (მაისი – 68 მლნ; -42%m.m). 1 ივლისის მდგომარეობით …