დასანგრევია თუ არა ახალი მშენებლობები – დეველოპერების პასუხი სეისმოლოგებს და გეოლოგებს

თბილისი (BPI) – სამშენებლო ბუმი, რომელმაც დედაქალაქი მთლიანად მოიცვა, შესაძლოა, დამანგრეველი აღმოჩნდეს.

გეოლოგები და სეისმოლოგები იმ საფრთხეებზე საუბრობენ, რომელიც შესაძლოა, ძლიერ მიწისძვრას მოჰყვეს. პრობლემა ქაოსური და უკონტროლო მშენებლობებია. სპეციალისტები ამბობენ, რომ ახლადაშენებული კორპუსების დიდი ნაწილი საშუალო დონის მიწისძვრასაც კი ვერ გაუძლებს.

პრობლემა გეოლოგიური დასკვნაა, რომლეიც კორპუსის მშენებლობამდე გაიცემა. გეოლოგიური რევიზია აჩვენებს გრუნტის სახეობას, სიღრმეს. ის არის მთავარი სახელმძღვანელო სამშენებლო მასალის, ტექნოლოგიის, მთელი პროექტისათვის მომავალში.

დედამიწის შემსწავლელ მეცნიერებათა ინსტიტუტისა და სეისმოლოგიის ეროვნული ცენტრის დირექტორი, თეა გოდოლაძე, ამბობს, რომ გეოტექნიკურისამუშაოები ყალბდება და 100 ლარად ნებისმიერ ფურცელს იყიდი. ამასთან, გეოლოგების ლიცენზირება არ არსებობს და შესაბამისად, ამ პროფესიის ადამიანების კონტროლის მექანიზმი სახელმწიფოს არა აქვს.

თბილისში არსებული სამშენებლო პოლიტიკის თანახმად კი, დამკვეთი ვალდებულია, არქიტექტურის სამსახურს, სხვა საბუთებთან ერთად, წარუდგინოს გეოტექნიკური დასკვნაც. დასკვნაზე კი კერძო კომპანიები და ფიზიკური პირები მუშაობენ. ქანების შესწავლის პროცესს და შედეგს სახელმწიფო არ აკონტროლებს. ის ექსპერტს უპირობოდ ენდობა.

არამხოლოდ გეოლოგიურ ექსპერტიზაზე, მერია პასუხს არც მშენებლობის ხარისხზე აგებს, რომელიც საქართველოში უკიდურესად მოძველებული ნორმებით რეგულირდება.

4,5 მაგნიტუდის სიმძლავრის მიწისძვრა თბილისში 2002 წელს დაფიქსირდა. სეისმოლოგები ასეთ რყევას სუსტი მიწისძვრის კატეგორიაში მიითვლიან. მიუხედავად ამისა, თბილისში 12 000 შენობა დაზიანდა, უკლებლივ ყველა სკოლა, რის გამოც სასწავლო პროცესი შეჩერდა. იყო მსხვერპლიც. გარდაიცვალა 7 ადამიანი.

Caucasus business week-ი დაინტერესდა, ეთანხმებიან თუ არა გეოლოგების და სეისმოლოგების მოსაზრბას დეველოპერული კომპანიები და რამდენად სანდოა მათ მიერ აშენებული შენობები?

კომპანია „GDG+“-ის დამფუძნებელი ბეჟან წაქაძე არ ეთანხმება სეისმოლოგებისა და გეოლოგების მოსაზრებას იმასთან დაკავშირებით, რომ ახალი აშენებული ან მშენებარე კორპუსები არამდგრადია. მისი თქმით, დედაქალაქში არ მოიძებნება მშენებელი, ვინც გელოგიურ დასკვნას არ გააკეთებს, რადგან აღნიშნული ყველაზე მნიშვნელოვანია კონსტრუქციული სქემის შესადგენად.

„არ ვიცი რა ხდება რეგიონებში, მაგრამ დარწმუნებული ვარ ქალაქში რომელიმე კორპუსი სეისმურად არამდგრადი და საშიში იყოს. პირადად, ჩვენ ყოველთვის პროფესინალ გეოლოგებთან დავდივართ. რაც შეეხება თავად მშენებლობის ხარისხს,  სიმართლეა რომ ეს მხარე ძველი ნორმებით რეგულირდება, თუმცა არსებობს პროგრამა , რომელიც მაღალ დონეზეა შემუშავებული და სწორედ ამის მიხევდით ვმოქმედებთ, ამიტომ არც ამ მიმართულებაშია რაიმე ხარვეზი“,- აცხადებს წაქაძე.

ბეჟან წაქაძის პოზიციას იზიარებს კომპანია „რედკოს“ პროექტების მენეჯერი მალხაზ კუნელაურიც. მისი თქმით, აღნიშნული საკითხის შესახებ მუშაობა ინდივუდუალურ მიდგომას საჭიროებს.

„რის საფუძველზე აკეთებენ სეისმოლოგები და გელოგოები ამ  განცხადებას, ჩემთვის გაუგებარია.  თუ არის კონკრეტული შემთხვევა და გაკეთდა ექსპერტიზა, მაშინ ეს საქმე ინდივიდუალურად უნდა შეისწავლონ“,-აცხადებს კუნელაური.

მისივე თქმით, არასწორია  გეოლოგების ლიცენზირების დღის წესრიგში დაყენების საკითხიც, რადგან ამ გზით შესაძლოა კორუფიის ახალი წყარო გაჩნდეს.

„არ ვეთანხმები არც გეოლოგების ლიცენზირების აუცილებლობას, ეს არ არის კვალიფიცირებული საქმის განმსაზღვრელი. იმ შემთხვევაში თუ რამდენიმე კომპანიას ლიცეზია მიენიჭება, ამან შესაძლოა კორუფციის ახალი წყარო გააჩინოს და ბაზარზე გარკვეული პროდუქტების მიღების შესაძლებლობაც გააძვიროს.  ზოგადად მიმაჩნია, რომ თავისუფალი საბაზრო ეკონომიკის პირობებში  პროცესები ნაკლებად ბიუროკრატიული უნდა იყოს და იმედია ასეც იქნება“,-განმარტავს კუნელაური.

მრავალფუნქციურ კომპლექს King David -ში აცხადებენ, რომ  King David -ის შესახებ ბევრი ჭორი მოისმენიათ,  თუმცა ძირითადი ჭორი მის საძირკვლის არამდგრადობაზე მაინც ყველაზე გავრცელებულია. მათი განცხადებით, საძირკვლის სიმყარეზე ეჭვებს პროექტის კლდეზე მდებარეობა განაპირობებს, არადა კლდეზე ნაშენები შენობა ყველაზე მყარია.

„მშენებლობის დაწყების წინ კლდეს რათქმაუნდა ჩაუტარდა გეოლოგიური და გეოფიზიკური შემოწმება. შემოწმების  საფუძველზე დადგინდა რომ საძირკვლის ძირის საპროექტო ნიშნულს შეესაბამაბა მე-7 კატეგორიის კლდოვანი ქანი არგელიტების სახით. ფუნდამენტი კი წარმოადგენს ერთიან რკინა-ბეტონის ფილას, რომელიც სიმაღლეში თითქმის 2 მეტრია. გასაგებ ენაზე რომ ვთქვათ, ეს არის ერთერთი ყველაზე მყარი საძირკველი საქართველოში. გეოლოგიური და გეოფიზიკური დასკვნებთან გაცნობა შეუძლია ნებისმიერ დაინტერესებულ პირს.

King David-ის შენობის მზიდ კონსტრუქციას წარმოადგენს მონოლითური რკინაბეტონის ჩარჩო კავშიროვანი სისტემა ხისტი კვანძებით  და შენობის ცენტრში განლაგებული სიხისტის ბირთვით. ნაგებობის სივრცითი მოდელი გაანგარიშებულია 8-ბალიან სეისმურ ზემოქმედებაზე ქარის დატირთვის გათვალისწიებით.  მშენებლობის პროცესში სისტემატიურად ისინჯებოდა სამშენებლო მასალების: არმატურის და ბეტონის ხარისხი, კვალიფიციური კვლევითი ლაბორატორიის მიერ. მშენებლობის დასრულების შემდეგ კი არსებულ მზიდ კონსტრუქციებს ჩაუტარდა ექსპერტიზა ადგილობრივი და საერთაშორისო კომპანიების მიერ. ექსპერტიზის დასკვნის შედეგად  მშენებლობის ხარისხი შეესაბამება საერთაშორისო სტანდარტებს“-აცხადებენ King David-ში.

მათი ინფორმაციით, პროექტის ფასადი შესრულდა გერმანული კომპანიის SCHUCO-ს ზედამხედველობით და მათ მიერვე ჩაუტარდა შემოწმება გერმანიაში SCHUCO-ს ტექნიკურ ბაზაზე . ტესტირებამ აჩვენა რომ ფასადი გათვლილია ნებისმიერი სახის სტიქიაზე, მათ შორის 9 ბალიან მიწისძვრაზეც.

ის, ვინც აღნიშნულ მიმართულებაში შესაძლო ხარვეზებს ეთანხმება, ეს კომპანია „საბა კონტრაქშენის“  ხელმძღვანელი ლევან თარგამაძეა. მისი მტკიცებით,   კერძო დაკვეთებზე არ ვრცელდება სავალდებულო ზედამხედველობა, ამიტომ შეცდომები შეიძლება არსებობდეს.

„ჩვენი მიმართულება საბინაო კორპუსების მშენებლობა არ არის. ძირითადად სახელმწიფო პროექტებზე ვმუშაობთ, სადაც სავალდებულო ზედამხედველობის სხვა სისტემაა. რაც შეეხება კერძოს, იქ შეიძლება რაიმე შეცდომები იპარებოდეს და ზედამხედველობის აუცილებლობის შემთხვევაში ხარისხი ალბათ უფრო იქნება დაცული,“-აღნიშნავს თარგამაძე.

მისივე თქმით, სხვა საკითხია კონკრეტულად სეისმური პრობლემა, რადგან გეოგრაფიული ადგილმდებარეობის გამო კონსტრუქციები გათვლილია 8 ბალიან სისტემაზე.

„როგორც ვიცი, ყველა კონსტრუქცია სწორედ 8 ბალიან სისტემაზეა გათვლილი და ის თუ ტექნიკური ნორმების დაცვითაა აშენებული, მაშინ პრობლემა არ უნდა იყოს. რაც შეეხება თავად მშენებლობის ხარისხს,  ვფიქრობ კარგი სტანდარტებია ჩვენთან.  უბრალოდ, მთავარია დავიცვათ ეს სტანდარტი. კიდევ ერთხელ აღვნიშნავ, რომ ამ კუთხით  რაიმე მნიშვნელოვან სირთულეს ვერ ვხედავ, მაგრამ რაც შეეხება ზედამხედველობის საკითხს, ეს ალბათ საჭიროა“, აცხადებს თარგამაძე.

CBW