ბახტაძე: გერმანიის მთავრობის მხარდაჭერა უზრუნველყოფს საქართველოს პრიორიტეტული სფეროების შემდგომ განვითარებას

თბილისი (BPI) – გერმანიის ფედერაციული რესპუბლიკის მთავრობასთან ერთად, გასული წლის შემოდგომაზე სამთავრობო კონსულტაციების დროს, შევთანხმდით ისეთი პრიორიტეტული მიმართულებებით თანამშრომლობაზე, რომელმაც უნდა უზრუნველყოს საქართველოს შემდგომი განვითარება, – განაცხადა ფინანსთა მინისტრმა, მამუკა ბახტაძემ საქართველოს მთავრობასა და გერმანიის ფედერაციული რესპუბლიკის მთავრობას შორის ფინანსური თანამშრომლობის შესახებ შეთანხმების გაფორმების შემდეგ, რომელსაც გერმანული მხრიდან ხელი მოაწერა გერმანიის ფედერაციული რესპუბლიკის საგანგებო და სრულუფლებიანმა ელჩმა საქართველოში ჰაიკე ფაიჩმა.

ფინანსთა მინისტრმა, მამუკა ბახტაძემ გერმანიის ფედერაციული რესპუბლიკის ელჩს მადლობა გადაუხადა იმ მხარდაჭერისთვის, რომელსაც გერმანიის მთავრობა უწევს ჩვენს ქვეყანას მნიშვნელოვანი პროექტების დაფინანსების, ასევე, ევროპასთან ურთიერთობების გაღრმავების მიმართულებით. მხარეებმა მიმოიხილეს არსებული და სამომავლო თანამშრომლობის საკითხები. ხაზგასმით აღინიშნა ინფრასტრუქტურის და ენერგეტიკის სექტორებში მიმდინარე პროექტები და ასევე, ენერგოეფექტურობის კუთხით დაგეგმილი ღონისძიებები.

„გერმანია ჩვენი მეგობარი და ერთ-ერთი მთავარი პარტნიორი ქვეყანაა. დღეს, ხელი მოვაწერეთ შეთანხმებას, რომლის მიხედვითაც საქართველო დამატებით მიიღებს 252,7 მილიონი ევროს (230 მილიონი ევრო სესხის და 22,7 მილიონი ევრო გრანტის სახით). აღნიშნული თანხა, ძირითადად, მოხმარდება ინფრასტრუქტურის განვითარებას, განათლების სექტორს, კერძოდ, პროფესიული განათლების სისტემის განვითარებას, დემოკრატიული ინსტიტუტების მშენებლობას, ენერგეტიკულ და გარემოს დაცვის პროექტებს. მსურს ამ ძალიან მნიშვნელოვანი დახმარებისთვის კიდევ ერთხელ მადლობა გადავუხადო გერმანიის მთავრობას, ასევე, ორ გერმანულ ფინანსურ ინსტიტუტს – გერმანიის რეკონსტრუქციის საკრედიტო ბანკს (KfW) და გერმანიის საერთაშორისო თანამშრომლობის საზოგადოებას (GIZ), რომელთა საშუალებითაც მოხდება აღნიშნული ფინანსური რესურსების ათვისება“, – აღნიშნა ფინანსთა მინისტრმა, მამუკა ბახტაძემ.

ხელმოწერის ცერემონიალს დაესწრნენ გერმანიის რეკონსტრუქციის საკრედიტო ბანკის (KfW) თბილისის ოფისის დირექტორი კლაუს ფეიგელი და გერმანიის საერთაშორისო თანამშრომლობის საზოგადოების (GIZ) დირექტორი როლანდ შტურერი.