ახალქალაქის იუსტიციის სახლი არქიტექტურის საერთაშორისო ფესტივალზე სამ საუკეთესო პროექტს შორისაა

თბილისი (BPI) – ახალქალაქის იუსტიციის სახლი არქიტექტორთა სართაშორისო ფესტივალის „არქიტექტურული პრემია 2018“-ზეა წარდგენილი. ნაგებობა „საუკეთესო საზოგადოებრივი შენობა“ ნომინაციაში შერჩეულ სამ საუკეთესო პროექტს შორისაა.

არქიტექტორთა მე-13 საერთაშორისო ფესტივალზე გამარჯვებული პროექტი 16 დეკემბერს გამოვლინდება.

ახალქალაქის იუსტიციის სახლის პროექტი არქიტექტორ მიხეილ გოირგობიანს ეკუთვნის. შენობა წელს, 18 ოქტომბერს საზეიმოდ გაიხსნა და ის რიგით მეოცე იუსტიციის სახლია. მომსახურების სივრცეების გარდა, აქ განთავსებულია სახელმწიფო სერვისების განვითარების სააგენტოს, საჯარო რეესტრის ეროვნული სააგენტოს, აღსრულების ეროვნული ბიუროსა და დანაშაულის პრევენციის ცენტრის ოფისები, ფუნქციონირებს ქორწინების სარიტუალო დარბაზიც, რომელიც ცალკე ფლიგელშია განთავსებული. ახალქალქის იუსტიციის სახლის გახსნამდე ახალქალაქს ქორწინების სახლი არასდროს ჰქონია.

არქიტექტორთა საერთაშორისო ფესტივალზე საუკეთესო საზოგადოებრივი ნაგებობის ნომინაციის საუკეთესო სამეულში მოხვედრა კიდევ ერთი დადასტურებაა იმისა, რომ იუსტიციის სახლების ფილიალები არა მხოლოდ განსაკუთრებული ფუნქციის მქონე, არამედ არქიტექტურული თვალსაზრისითაც გამორჩეული ნაგებობებია.

ეს პირველი შემთხვევა არაა, როცა იუსტიციის სახლის სხვადასხვა პროექტი არქიტექტურულ კონკურსზე წარმატებას აღწევს. „არქიტექტურული პრემია 2016“-ს კონკურსზე თიანეთის იუსტიციის სახლი 128 საკონკურსო ნამუშევარს შორის 3 საუკეთესოს შორის მოხვდა. კონკურსში იტალიელი, უკრაინელი, პოლონელი, ესპანელი, აზერბაიჯანელი, თურქი და ინდოელი არქტიტექტორების ნამუშევრები იყო წარმოდგენილი, უშუალოდ საუკეთესო საზოგადოებრივი ნაგებობის ნომინაციაში კი 14 არქიტექტურული ნამუშევარი.
საერთაშორისო კონკურსი “არქიტექტურული პრემია 2018” საცხოვრებელი თუ საზოგადოებრივი სივრცის, შენობების, ინტერიერის და დიზაინის მიმართულებებს მოიცავს. კონკურსის მიზანი, საუკეთესო პროექტების წარმოჩენა და იმ არქიტექტორებისა თუ დიზაინერების გამოვლენაა, რომელთაც თავისი წვლილი შეაქვთ არქიტექტურის განვითარების საქმეში.

შემთხვევითი სიახლე

პრემიერს ცრუ ბრალდებების არ ეშინია

თბილისი (BPI) – პრემიერს მისი, მისი ოჯახის და მისი გუნდის მიმართ ცრუ ბრალდებების არ ეშინია. …